पुणे : वेगवेगळ्या हस्तकलांमध्ये पारंगत असणाऱ्या नऊ महिला कलाकारांनी ‘नवरंग’ या हस्तकला प्रदर्शनाचे आयोजन केले आहे. पत्रकारनगर येथील दर्पण आर्ट गॅलरी येथे बुधवार, नऊ ते रविवार, १३ ऑक्टोबर दरम्यान सकाळी ११ ते सायंकाळी ७.३० या वेळेत सर्वांसाठी हे प्रदर्शन खुले राहणार आहे.
‘नवरंग’ या हस्तकला प्रदर्शनात श्रुती भागडीकर, श्यामला लोणकर, दीप्ती बावणे, दीपाली पाठक, अनन्या बोस, अर्चना कुलकर्णी, प्रीतम तुळशीबागवाले, सोनाली राणे, प्रणाली पारसनीस या नऊ महिला कलाकार आपल्या पर्यावरणपूरक व टिकाऊ कलाकृती येथे प्रदर्शित करणार आहेत. यात चांदीचे व क्रोशाचे दागिने, ड्रेस मटेरीयल्स, बॅग्ज आणि सौंदर्य प्रसाधने, सिरॅमिकची भांडी, बागेतील शोभेच्या वस्तू येथे बघायला मिळतील.
श्रुती भागडीकर या चांदी आणि खड्यांपासून दागिने बनवतात. ‘झुमका ज्वेलरी’ या संकेतस्थळावर हे दागिने उपलब्ध आहेत. ‘आयओरा क्रिएशन्स’च्या श्यामला लोणकर हाताने पेंटिंग केलेले अभ्रे, पिशव्या, टेबलक्लॉथ अशा वस्तू बनवतात. दीप्ती बावणे ‘मृदा’ या नावांतर्गत रोजच्या स्वयंपाकासाठी लागणारी मातीची भांडी आणि शोभेच्या वस्तू तयार करतात. दीपाली पाठक या ‘क्राफ्टझोन’ नावाने क्रोशाच्या वस्तू आणि दागिने बनवतात.
प्रणाली पारसनीस ‘प्रज्योत क्रिएशन्स’ अंतर्गत हाताने पेंटिंग केलेली ड्रेस मटेरिअल्स, तंजोर पेंटिंग, इजिप्शियन पेंटिंग, पॉटरी, ग्लास पेंटिंग यांची विक्री करतात. अनन्या बोस यांच्या ‘म्रीदा’ या नावांतर्गत टाकाऊपासून टिकाऊ आणि आकर्षक वस्तू बनवतात. अर्चना कुलकर्णी या ‘निर्विघ्न’ या नावांतर्गत जैविक साबण, शाम्पू आदी आंघोळीस उपयुक्त सौंदर्य प्रसाधने बनवतात. प्रीतम तुळशीबागवाले ‘थार’ या नावाने शोभेचे किंवा खेळण्यातील प्राणी, घरातील बागेच्या सुशोभिकरणाच्या वस्तू, घरात लावता येण्यासारखी झाडे, जैविक घटक वाढविणाऱ्या बॅग्ज आदी वस्तू बनवतात. सोनाली राणे या ‘सोनचाफा’ अंतर्गत विविध प्रकारच्या कापडी बॅग्ज, जॅकेट, कापडी दागिने आदी बनवतात.